Tue, 01/30/2024 - 21:24

Yosh olimlarning ilmiy mulohazalari tinglandi

2024-yil 30-yanvarda Alisher Navoiy nomidagi Toshkent davlat o'zbek tili va adabiyoti universitetida an'anaviy tarzda o'tkazib kelinayotgan O'zbek filologiyasi fakulteti Kengashi qoshidagi xalqaro nazariy-metodologik seminarning navbatdagisi bo'lib o'tdi. Bu galgi seminarda f.f.d., professor Muhayyo Hakimova "O'zbek tilidagi kognitiv metaforalarda milliy tafakkurning aks etishi", f.f.doktori Shermuhammad Amonov "Tabibiyning "Tuhfatu-s-sulton" devoni genealogiyasi", f.f.doktori Ilyos Ismoilov "Alisher Navoiy hikoyatlari genezisini o'rganish masalalari" mavzularida ma'ruza qildilar. Ushbu ma'ruzalarda o'zbek tilidagi kognitiv metaforalar umumiy va individual kognitiv metaforalar; Tabibiyning devonlari, xususan, "Tuhfatu-s-sulton" devoni genealogiyasi, mavzu ko'lami, janrlari, muallifning davrdosh ijodkorlardan farqi; Alisher Navoiy hikoyatlari genezisini o'rganish masalalari, shuningdek, Iskandar obrazi va unga yondashuv tamoyillari haqida qiziqarli ma'lumotlar berildi. Mavzu yuzasidan ma'ruzachilarga f.f.d., professor Baxtiyor Abdushukurov, f.f.d., professor Uzoq Jo'raqulov, f.f.d., professor Iroda Azimovalar savollar berishdi va o'zlarining fikr-mulohazalarini bildirishdi. Seminarda fakultet professor-o'qituvchilari,  tayanch doktorantlar va mustaqil tadqiqotchilar qatnashdi. Qizg'in bahs-munozara tarzida o'tgan seminar yig'ilganlarda katta taassurot qoldirdi.

Tue, 01/30/2024 - 15:05

Akademik Shuhrat Sirojiddinov samarqandlik ziyolilar bilan uchrashdi

Prezidentimiz har bir murojaatida yurtimizda amalga oshirilayotgan keng ko'lamli islohotlarning oldingi safida ziyolilar bo'lishi, aynan ularga suyanishini qayd etadi. Shu ma'noda, taniqli ziyolilar yurtimizning barcha hududlarida yurtdoshlarimiz bilan uchrashib, o'z fikrlari va tahlillari bilan o'rtoqlashmoqdalar. Ana shunday uchrashuvlardan biri Samarqand viloyati  Pedagogika markazida bo'lib o'tdi. Uchrashuvda Alisher Navoiy nomidagi Toshkent davlat oʻzbek tili va adabiyoti universiteti rektori, akademik, Shuhrat Sirojiddinov ma'ruza qildi. Pedagogika markazi direktori, professor A.Ibragimov Shuhrat Sirojiddinovning ilmiy faoliyatini e'tirof etib, 2023-yil 23-dekabrda  Sh.Sirojiddinovni Oʻzbekiston Fanlar Akademiyasining haqiqiy aʼzosi etib tasdiqlangani va akademik unvoni berilganligi bilan samimiy qutladi.
Uchrashuvda Shuhrat Sirojiddinov yoshlar tarbiyasi, muallimlarning mas'uliyati, islohotlar, vatanparvarlik, ijtimoiy davlat tushunchasi, siyosiy yetuklik va sog'lom diniy eʼtiqod haqida oʻz mulohazalari bilan oʻrtoqlashdi.
Davra suhbatida viloyat hokimligi mas'ullari va markaz professor-o'qituvchilari va tinglovchilar ishtirok etdi.

Mon, 01/29/2024 - 18:20

"O'rxun" dasturi g'oliblari bilan suhbat

Universitetimiz talabalari Sevinch Qayumova hamda Munisa Rafiqjonova "Orxun" dasturi g'olibi bo'lib, bir semestr davomida  Turkiyaning nufuzli Ege universitetida tahsil olishdi.  "Orxun" almashinuv dasturi – bu turkiy davlatlar universitetlari o’rtasida akademik almashinuv dasturidir. Dastur doirasida o’qish uchun bir nechta qadamlar bor. Barcha bosqichlardan muvaffaqiyatli o'rtgan Munisa Ege universitetining Turk tili va adabiyoti bo'limiga, Sevinch esa Tarjima bo'limiga o'qishga yuborildi. Ularga O’rta Turkcha (“Qutadg’u Bilig”, “Devoni lug’atit-turk” asarlarining tillari), Eski Turkcha, Dunyoda Turkologiya masalalari, Turk dunyosida adabiy aloqalar, Folklor, Eski yozuv haqida darslar o'tildi. 
"Bu yerda o’tgan ijtimoiy, darsdan tashqaridagi hayotimning o’zi bir boshqa olam bo’ldi. Nafaqat turk dunyosi: Turkiya, Ozarbayjon, Qozog’iston, Qirg’iziston, balki butun dunyodan do’stlar orttirdik," deydi, Munisa Rafiqjonova. 
Tahsil olish davomida talabalarimiz xalqaro “Turk dunyosi modernlashuvi: roman va hikoya sempoziumi”da ham ishtirok etishdi. Sempozium Ismoil Gaspirali xotirasiga bag’ishlab o’tkazildi va XX asr boshlarida adabiyotdagi o’zgarishlar, jadid adabiyotini qamrab oldi. Talabalarimiz bu yirik nufuzli tadbirda ko'ngilli sifatida ishtirok etib, o'z mahoratlarini ko'rsatgach, erkin tarjimon sifatida ham bir muddat faoliyat olib borishdi.

"Ege universiteti rektori va prorektori ishtirokida bizga o’qiganimiz haqida ma’lumotnomalar topshirishdi, taassurotlar, fikrlarimizni so’rashdi. Esdaliklar berib xayrlashuv marosimi tashkillashdi. Rektor Nejdaet Budak rektorimizga va butun universitetimiz jamoasiga ko’p salom aytdilar. Selami Fedakar ustozimizning ham rektorimizga va ustozlarimizga ko’p salomlari bor. Bo’limdagi ustozlar va magistratura talabalari aka-opalarimiz hamma-hammaga salom yetkazishimizni so’rashdi", deya suhbatini yakunladi Munisa Rafiqjonova. 
Endi Sevinch va Munisa xorijda o'rganganlarini universitetimiz talabalari bilan baham ko'radilar, ijobiy tajribalarni o'zlashtiramiz. Barcha talabalarimizni mana shunday dasturlarda ishtirok etishga chaqiramiz. Zotan, xorijda bilim olish, tajriba orttirish hamisha manfaatli bo'lgan.