Thu, 10/16/2025 - 10:05

Tarixiy shaharlar — milliy o‘zligimiz va ma’naviy merosimiz timsoli

2025-yil 15-oktyabr kuni Alisher Navoiy nomidagi Toshkent davlat o‘zbek tili va adabiyoti universitetida “Boqiy shaharlarimiz” mavzusida 7-Ma’rifat darsi o‘tkazildi. Tadbirda universitet professor-o‘qituvchilari, tarixchi olimlar hamda talaba-yoshlar faol ishtirok etdilar.
Mazkur darsning asosiy maqsadi yoshlar qalbida milliy g‘urur, vatanparvarlik, tarix va madaniyatga hurmat tuyg‘ularini uyg‘otish, ularni ajdodlardan meros bo‘lib qolgan bebaho qadriyatlarni asrab-avaylashga chorlashdan iborat bo‘ldi. Bugungi kunda yoshlarning ma’naviy dunyosini boyitish, ularning tarixiy xotirasini mustahkamlash dolzarb masalalardan biri hisoblanadi. Shu ma’noda, “Boqiy shaharlarimiz” mavzusi o‘tmish merosimizni zamonaviy yondashuv asosida talqin etish imkonini berdi.
Dars davomida ishtirokchilarga O‘zbekistonning qadimiy va buyuk shaharlaridan biri bo‘lgan Samarqandning jahon sivilizatsiyasidagi o‘rni, Buxoroning islom madaniyati rivojiga qo‘shgan hissasi, Xivaning me’moriy obidalari, Termizning buddaviy madaniyatdagi ahamiyati, Shahrisabzning buyuk sarkarda Amir Temur hayoti bilan bog‘liqligi haqida batafsil ma’lumotlar berildi. Shu orqali talabalar o‘z yurtining boy tarixi, betakror madaniy merosi va xalqimizning ilm-fan sohasidagi yutuqlari bilan yanada yaqindan tanishdilar.
Tadbirda so‘z olgan professor va tarixchi olimlar “Boqiy shaharlarimiz” mavzusi nafaqat o‘tmish faxrimiz, balki bugungi taraqqiyot, turizm va madaniyat sohasining ajralmas qismi ekanini ta’kidladilar. Ularning fikricha, bunday darslar yoshlarning milliy o‘zligini anglash, tarixiy ildizlarga hurmat bilan qarash, o‘z Vatanini yanada chuqurroq sevish tuyg‘usini kuchaytiradi.

Ma’rifat darsi jarayonida talabalar ham faol ishtirok etdilar. Ular tarixiy shaharlarimizga bag‘ishlangan multimedia taqdimotlar tayyorlab, o‘z fikr va mulohazalarini bildirdilar. Taqdimotlarda shaharlarning madaniy merosini asrab-avaylash, ularni kelajak avlodga yetkazish, tarixiy yodgorliklarni xalqaro miqyosda targ‘ib etish masalalari yoritildi. Talabalar o‘z ishlanmalarida milliy qadriyatlarga hurmat, estetik did va zamonaviy yondashuvni uyg‘unlashtirishga harakat qildilar.

Tadbir yakunida professor-o‘qituvchilar faol ishtirok etgan talabalarga minnatdorlik bildirdilar. Ular bunday ma’naviy-ma’rifiy darslar yoshlarni faollikka, izlanishga va milliy o‘zligiga sodiq bo‘lishga undashini alohida qayd etdilar.
“Boqiy shaharlarimiz” mavzusidagi 7-Ma’rifat darsi yoshlar qalbida o‘z yurti bilan faxrlanish, tarixiy ildizlarini chuqur anglash va kelajakka ishonch bilan qarash tuyg‘ularini mustahkamladi. Tadbir ilmiy, ma’naviy va tarbiyaviy ruhda, samimiy muloqot tarzida o‘tkazilib, ishtirokchilarda chuqur taassurot qoldirdi.

Wed, 10/15/2025 - 23:05

Tadiqotchilar uchun qoʻshimcha fanlardan malakaviy imtihonlar oʻtkazildi

2025-yil 15-oktabr kuni Alisher Navoiy nomidagi Toshkent davlat o‘zbek tili va adabiyoti universitetida tayanch doktorantlar va mustaqil izlanuvchilar uchun qo‘shimcha fanlardan malakaviy imtihon bo‘lib o‘tdi. Mazkur imtihon ilmiy-tadqiqot yo‘nalishlarida malaka oshirish va akademik salohiyatni baholashga qaratilgan bo‘lib, unda turli ixtisosliklar bo‘yicha talabgorlar ishtirok etdilar. Imtihon jarayonlari yuqori akademik standartlar asosida tashkil etilib, ishtirokchilarning bilim va ko‘nikmalari o‘z sohasida yetuk olimlardan iborat komissiya tomonidan har tomonlama baholandi. Qo‘shimcha fanlardan malakaviy imtihonlar folklor va adabiy manbashunoslik nazariyasi, matn va uni talqin qilish tamoyillari, xalq og‘zaki ijodi poetikasi, jahon adabiyoti nazariyasi va qiyosiy adabiyotshunoslik, chog‘ishtirma tilshunoslik va lingvotarjimashunoslik, qiyosiy tilshunoslikning zamonaviy yo‘nalishlari, adabiyotshunoslik metodologiyasi, badiiy tahlil asoslari, adabiyotshunoslik tarixi, lingvokulturologiya va matn tilshunosligi, nazariy tilshunoslik va pragmalingvistika hamda psixolingvistika yo‘nalishlari bo‘yicha o‘tkazildi. Imtihonlar filologiya fanlari doktori, professor I. Yo‘qubov, filologiya fanlari doktori, professor S. Normamatov hamda filologiya fanlari doktori, professor D. Yusupovalar raisligida shaffof tarzda o‘tkazilib, Zoom platformasi orqali onlayn translyatsiya qilindi.

Wed, 10/15/2025 - 18:29

ToshDO‘TAU talabasi “O‘zbek tili – qalbim tarjimoni” tanlovi g'olibi bo'ldi!

Vazirlar Mahkamasining Davlat tilini rivojlantirish departamenti, Oliy ta’lim, fan va innovatsiyalar vazirligi hamda tegishli mas’ul tashkilotlar hamkorligida o‘tkazilgan “O‘zbek tili – qalbim tarjimoni” respublika ko‘rik-tanlovining yakuniy bosqichida Alisher Navoiy nomidagi Toshkent davlat o‘zbek tili va adabiyoti universiteti talabasi, Shen Xintong (Shanxay chet tillari universitetining 3-bosqich talabasi, akademik almashinuv dasturi doirasida O‘zbek tili va adabiyoti fakultetida tahsil olmoqda) faxrli 1-o‘rinni egalladi. Unga Shanxay chet tillari universitetiga o'zbek tilidan dars berish uchun aynan ToshDO'TAUdan yuborilgan mutaxassislar ona tilimizni o'rgatishgan. 
Tanlov an’anaviy tarzda oliy ta’lim muassasalarida tahsil olayotgan, ona tili o‘zbek tili bo‘lmagan xorijlik talabalar o‘rtasida tashkil etilib, ularning o‘zbek tiliga bo‘lgan muhabbati va ijodiy salohiyatini namoyon etishga xizmat qiladi.

Tadbirda Oliy ta’lim, fan va innovatsiyar vazirligi Yoshlar siyosati, ma’naviy tarbiyaviy ishlar boshqarma boshlig’i Kasimov Nodir Ulug‘ovich hamda Vazirlar Mahkamasining Davlat tilini rivojlantirish departamenti mudiri Nodir Xolbo‘tayev ishtirok etib, o‘zbek tilining xalqaro miqyosdagi mavqei va nufuzini yanada yuksaltirish masalalariga to‘xtaldilar.

Final bosqichining “Erkin mavzuda badiiy chiqish” sharti doirasida ishtirokchilar o‘zbek tilidagi she’r va qo‘shiqlarni ijro etish orqali o‘z mahoratlarini namoyish etdilar. Xorijlik talabalar tomonidan tayyorlangan chiqishlar o‘zbek tiliga bo‘lgan hurmat va e’tiqodning yorqin ifodasiga aylandi.
Shen Xintongning g‘alabasi — bu nafaqat shaxsiy yutuq, balki ToshDO‘TAUda olib borilayotgan samarali ta’lim jarayoni, o‘zbek tilini chet ellik talabalarga o‘qitish bo‘yicha yaratilgan ilg‘or muhitning amaliy natijasidir.

Tanlov g‘oliblari diplom va bazaviy hisoblash miqdorining 40, 30 va 20 barobari miqdorida pul mukofotlari bilan taqdirlandi, faol ishtirokchilarga esa sertifikatlar va esdalik sovg‘alari topshirildi.
ToshDO‘TAU jamoasi Shen Xintongni samimiy tabriklaydi!
Unga ilm yo‘lida yangi yutuqlar, o‘zbek tili va madaniyatini xalqaro miqyosda targ‘ib etishda muvaffaqiyatlar tilaymiz!

Shuni alohida qayd etish kerakki, Shanxay chet tillari universiteti bilan ToshDOʻTAU hamkorligi bir necha yillardan beri samarali davom etmoqda. Oʻtgan yilning dekabr oyida universitetimiz Ilmiy ishlar va innovatsiyalar boʻyicha prorektori Nozliya Normurodova mazkur universitetda boʻlib, oʻzbek tili yoʻnalishida tahsil olayotgan xitoylik talabalarining ToshDOʻTAUda akademik mobillik asosida oʻqishlari xususida suhbatlashgan va rejlashtirilgan edi. Ushbu kelishuv samarasi oʻlaroq 6 nafar xitoylik talaba joriy oʻqyv yilida universitetimizda tahsil olishmoqda. 

Wed, 10/15/2025 - 11:33

Hokimlik vakili talabalar bilan ochiq muloqot o'tkazdi

2025-yil 15-oktabr kuni Alisher Navoiy nomidagi Oʻzbek tili va adabiyoti universitetiga Toshkent shahar hokimining oʻrinbosari — Oila va xotin-qizlar boshqarmasi boshligʻi Shahnoza Sultonova hamda Yakkasaroy tumani hokimining oʻrinbosari, Oila va xotin-qizlar boʻlimi boshligʻi Dilfuza Rasulmuxamedova tashrif buyurishdi. Tashrifning asosiy maqsadi universitet hayoti, talabalar yashash sharoiti va yoshlar uchun yaratilgan imkoniyatlar bilan yaqindan tanishishdan iborat boʻldi.

Mehmonlar avvalo talabalarning istiqomat qilayotgan yotoqxonasini koʻzdan kechirdilar. Ular yotoqxonaning umumiy holati, yashash xonalari, o‘quv va dam olish joylari, gigiyena, xavfsizlik va texnik xizmat koʻrsatish sharoitlari bilan tanishdilar. Shuningdek, talabalar uchun yaratilgan zamonaviy o‘quv va maʼnaviy muhit, internetdan foydalanish imkoniyatlari, kutubxona burchaklari va jamoaviy ishlash xonalarining faoliyati haqida maʼlumot berildi.

Tashrif davomida mehmonlar universitetda tashkil etilgan “Besh tashabbus xonalari” faoliyati bilan ham yaqindan tanishdilar. Bu xonalar yoshlarning intellektual, ijodiy, texnologik va jismoniy rivojlanishini qo‘llab-quvvatlash maqsadida tashkil etilgan. Har bir tashabbus xonasida zamonaviy texnika vositalari, kompyuterlar, multimedia jihozlari, trening va seminarlar o‘tkazish uchun qulay sharoitlar yaratilgan. Bu markazlar talabalarga startap g‘oyalarini ishlab chiqish, ijtimoiy loyihalarni amalga oshirish, san’at va madaniyat yo‘nalishida o‘z iste’dodini namoyon etish, shuningdek, jamoatchilik faoliyatida faol ishtirok etish imkonini beradi.

Shuningdek, mehmonlar talabalar uchun yaratilgan boshqa qulayliklar — dam olish va muloqot hududlari, sport inshootlari, psixologik maslahat markazi hamda madaniy-maʼnaviy tadbirlar o‘tkaziladigan zal faoliyati bilan tanishdilar. Ular talabalarga yaratilgan imkoniyatlar yoshlarning har tomonlama barkamol rivojlanishiga xizmat qilayotganini e’tirof etdilar.

Tashrif doirasida “Rahbar ayol va yoshlar” mavzusida samimiy uchrashuv bo‘lib o‘tdi. Uchrashuv davomida talabalar o‘zlarini qiziqtirgan savollarni berishdi, fikr va takliflarini bildirishdi. Muloqot ochiq, do‘stona va ilhomlantiruvchi ruhda o‘tdi.

Shahnoza Sultonova yoshlarni zamonaviy bilimlarni chuqur egallashga, ijtimoiy hayotda faol ishtirok etishga, o‘z g‘oyalari bilan jamiyat rivojiga hissa qo‘shishga undadi. Uchrashuv yakunida talabalar va mehmonlar o‘rtasida hamkorlikni davom ettirish, yoshlar tashabbuslarini qo‘llab-quvvatlash hamda ta’lim muassasasida bunday uchrashuvlarni muntazam tashkil etish bo‘yicha kelishuvlarga erishildi.

Tue, 10/14/2025 - 17:19

Talabalar bandligini ta'minlash bo'yicha muhim shartnoma imzolandi

Alisher Navoiy nomidagi Toshkent davlat o‘zbek tili va adabiyoti universiteti, “Naimix” xususiy bandlik agentligi hamda “United Skills Hub” o‘quv markazi o‘rtasida kadrlarni tayyorlash, qayta tayyorlash va malakasini oshirish sohasida hamkorlik to‘g‘risida anglashuv memorandumi imzolandi.
Hujjatga Alisher Navoiy nomidagi Toshkent davlat o‘zbek tili va adabiyoti universiteti rektori, O‘zbekiston FA akademigi Shuhrat Sirojiddinov, “Naimix” xususiy bandlik agentligi rahbari S. Qushoqov hamda “United Skills Hub” o‘quv markazi direktori D. Raximova imzo chekdi.
Mazkur memorandum asosida tomonlar ta’lim sifatini oshirish, talabalar va mutaxassislarni zamonaviy mehnat bozori talablariga mos tarzda tayyorlash, o‘quv dasturlarini ishlab chiqish va amalga oshirish, shuningdek, xorijiy tajribani o‘rganish hamda innovatsion ta’lim yondashuvlarini joriy etish bo‘yicha hamkorlikni yo‘lga qo‘yadilar.

Shuningdek, qo‘shma o‘quv va malaka oshirish dasturlarini tashkil etish, xorijiy ish beruvchilar bilan aloqalarni mustahkamlash, raqamli ta’lim texnologiyalarini joriy etish hamda yoshlarning bandligini ta’minlashga ko‘maklashish rejalashtirilgan.

Ushbu memorandum ta’lim tizimi bilan mehnat bozori o‘rtasidagi integratsiyani kuchaytirish, malakali va raqobatbardosh kadrlar tayyorlashga xizmat qiladi.

Mon, 10/13/2025 - 17:25

“Adiblar xiyoboni”da ma’naviy-ma’rifiy va sport tadbirlari o‘tkazildi

2025-yil 13-oktyabr kuni Alisher Navoiy nomidagi Toshkent davlat o‘zbek tili va adabiyoti universiteti filologiya va tillarni o‘qitish (o‘zbek tili) yo‘nalishi talabalari hamda universitet tyutorlari ishtirokida “Adiblar xiyoboni”da keng qamrovli ma’naviy-ma’rifiy va sport tadbirlari o‘tkazildi.

Tadbirning asosiy maqsadi yoshlar qalbida adabiyot va san’atga mehr uyg‘otish, milliy qadriyatlarni asrab-avaylash, shuningdek, sog‘lom turmush tarzini targ‘ib etishdan iborat bo‘ldi. Dastur doirasida talabalar o‘rtasida arqon tortish musobaqasi hamda she’rxonlik bellashuvlari tashkil etildi. Faol ishtirokchilar universitet ma’muriyati tomonidan rag‘batlantirildi.
Mazkur tadbir yoshlarning ijodiy tafakkurini rivojlantirish, ularni adabiyot va san’at olamiga yanada yaqinlashtirish, shuningdek, sport orqali jamoaviylik va do‘stlik tuyg‘ularini mustahkamlashga xizmat qildi.

Tadbir yakunida ishtirokchilar “Adiblar xiyoboni”da joylashgan buyuk adiblar haykallari va ularning hayoti hamda ijodiga oid ma’lumotlar bilan tanishdilar. Bu esa talabalar qalbida milliy g‘urur, vatanparvarlik, xalqimizning boy madaniy merosiga hurmat va sadoqat tuyg‘ularini yanada chuqurlashtirishga xizmat qildi.

Bunday ma’naviy-ma’rifiy tadbirlar yoshlarni milliy qadriyatlar, urf-odatlar va milliy o‘zlikni qadrlash ruhida tarbiyalash, ularning dunyoqarashini kengaytirish hamda barkamol avlod sifatida voyaga yetishida muhim ahamiyat kasb etadi.