Ilmiy va innovatsion taraqqiyotda ToshDOʻTAUning hissasi keng muhokama qilindi
Bugun, 7-yanvar 2025-yil, Toshkent davlat oʻzbek tili va adabiyoti universitetida professor-oʻqituvchilar uchun muhim seminarlar oʻtkazildi. Ushbu seminarlar pedagog-xodimlarning ilmiy va ma’naviy-maʼrifiy faoliyatini rivojlantirishga qaratilgan boʻlib, kun tartibida uchta asosiy ma’ruza tinglandi.
Seminarning birinchi qismi ilmiy ishlar, innovatsiyalar va xalqaro hamkorlik boʻyicha prorektor N.Normurodova tomonidan taqdim etilgan “Oʻzbekistonda oliy taʼlim tizimining transformatsiyasi va ToshDOʻTAUning bu jarayonda taraqqiyot drayveri sifatidagi roli” mavzusidagi maʼruza bilan boshlandi. N.Normurodova oʻz chiqishida Oʻzbekistonda oliy taʼlim tizimida amalga oshirilayotgan islohotlarning mohiyatini va ToshDOʻTAUning bu jarayondagi o‘rnini batafsil tahlil qildi. U ToshDOʻTAUni zamonaviy taʼlim va innovatsion jarayonlarning markaziy drayveri sifatida ko‘rsatib, universitetning xalqaro hamkorlik doirasidagi muvaffaqiyatlarini eʼtirof etdi. Ma’ruzada ToshDOʻTAUning taʼlim tizimini rivojlantirishdagi yangi tashabbuslari, global taʼlim standartlariga mos keluvchi ilmiy loyihalar va o‘quv dasturlarni joriy etish bo‘yicha erishilgan yutuqlar haqida batafsil maʼlumot berildi. Shuningdek, u xalqaro loyihalar va grantlar doirasida olib borilayotgan faoliyatning nafaqat universitet, balki mamlakat taʼlim tizimi uchun muhim ahamiyatga ega ekanligini ta’kidladi.
Keyingi maʼruza kompyuter lingvistikasi va raqamli texnologiyalar kafedrasi mudiri B. Elov tomonidan taqdim etilib, “Davlat maqsadli dasturi doirasida bajariladigan amaliy hamda innovatsion loyihalar tanlovida ishtirok etish hamda xalqaro loyihalardagi hamkorlik masalalari” mavzusida boʻldi. U innovatsion texnologiyalar va raqamli dasturlar asosida yangi loyihalar yaratish, ularni amaliyotga tatbiq etish jarayonlari haqida batafsil gapirdi. B. Elov xalqaro hamkorlikni kuchaytirish orqali universitetning ilmiy salohiyatini oshirish masalalariga ham eʼtibor qaratdi. Maʼruza davomida davlat maqsadli dasturlari doirasidagi loyihalar tanlovlarida ishtirok etishning universitet uchun imkoniyatlari va foydalari tahlil qilindi.
Kun so‘ngida yoshlar masalalari va maʼnaviy-maʼrifiy ishlar boʻyicha prorektor G. Joʻrayeva “Oʻzbekistondagi islohotlarni OAVda va gazeta-jurnallarda chop etish hamda kafedralarga biriktirilgan umumtaʼlim maktablari va mahallalarda olib borilayotgan maʼnaviy-maʼrifiy ishlar boʻyicha amalga oshirilayotgan ishlar” mavzusida maʼruza taqdim etdi. G. Joʻrayeva o‘z chiqishida universitetning yoshlar bilan ishlash borasidagi sa’y-harakatlari, maktab va mahallalar bilan hamkorlikda amalga oshirilayotgan loyihalar haqida so‘z yuritdi. U yoshlar o‘rtasida milliy qadriyatlarni targ‘ib qilish, ularni jamiyatda faol fuqarolar sifatida shakllantirish bo‘yicha olib borilayotgan maʼrifiy ishlar haqida batafsil axborot berdi. Shuningdek, universitetning bu boradagi ishlarini kengroq yoritish va ommalashtirish uchun OAV bilan ishlashning ahamiyati taʼkidlandi.
Ushbu seminarlar ToshDOʻTAUning innovatsion va ilmiy salohiyatini rivojlantirish, professor-o‘qituvchilarni yangi tashabbuslarga jalb etish va maʼnaviy-maʼrifiy yo‘nalishdagi ishlarni takomillashtirish uchun muhim platforma bo‘ldi. Ishtirokchilar o‘z tajribalari va fikrlari bilan o‘rtoqlashib, amaliyotga tatbiq etish mumkin bo‘lgan ko‘plab g‘oyalarni muhokama qildilar.
