"Xorijliklar uchun O'zbek tili" (A2 daraja uchun) darsligi yaratildi
Alisher Navoiy nomidagi Toshkent davlat o'zbek tili va adabiyoti universiteti huzuridagi "O'zbek maktabi" faoliyati rivojlanishda davom etmoqda. "O'zbek maktabi" tomonidan bundan bir necha oy oldin "Xorijliklar uchun o'zbek tili" (A1 daraja uchun) darsligi yaratilgan edi. Bu kitob keng jamoatchilik tomonidan iliq kutib olindi va mutaxassislar tomonidan ijobiy baholandi. Kuni kecha "O'zbek maktabi" tomonidan tayyorlangan "Xorijliklar uchun O'zbek tili" (A2 daraja uchun) darsligi ham nashrdan chiqdi. Kitob o'zbek tilidan boshlang‘ich bilimga ega qiziquvchilarga mo'ljallangan. Ushbu darslik A1 daraja uchun mo‘ljallangan darslikning uzviy davomi sifatida to'rtta til ko'nikmasi (gapirish, yozish, o'qish, tinglash) asosida A2 darajasidagi bilimlarni berishni ko'zda tutadi.
12 mavzudan iborat kitobda sodda grammatik mavzular o‘ziga xos milliy-madaniy matnlarga asoslangan holda mantiqan uzviy, metodik jihatdan natijakor topshiriqlar bilan mustahkamlanadi.
Darslikning yuqori sifati, amaliy ahamiyatini yanada oshirish uchun audio va video materiallar havola qilingan.
Bundan tashqari til o'rganuvchi bir paytning o'zida o‘zbek madaniyatiga oid so‘zlar, so‘zlashuvda faol iboralar bilan ham tanishtirib boriladi.
Ushbu darslik shu yo'nalishda yaratilgan mavjud o'zbek tili qo'llanmalaridan inglizcha ko'rsatma va izohlarning berilishi, har bir darsda ishlatilgan so'zlarning ingliz, fransuz, koreys, turk, rus tillaridagi tarjimasi ko'rsatilgani bilan ajralib turadi.
Har bir mavzu yakunida berilgan xilma-xil topshiriqlar, QR kodlarda keltirilgan video lavhalar, immitatsion audiolar o‘rganuvchini tanqidiy fikrlashga, nutq vaziyatiga moslashishga, lug‘at materiallar esa so‘z zahirasini yanada boyitishga xizmat qiladi.
Darslik yordamida til o'rganuvchilar tanish vaziyatlarda kerakli til vositalarini tanlash, oddiy vaziyatlarda og‘zaki va yozma nutqda fikrlarni uzviy ifoda eta olish singari pragmatik kompetensiyalarni egallashlari maqsad qilingan.
Bu mazkur darsliklar yordamida xorijliklar mustaqil yoki ustoz yordamida o'zbek tilini bemalol boshlang'ich darajada o'rganishlari mumkin.
Darslik sifati jahon andozalariga to'la javob beradi, ajoyib dizayni, mavzular ko'lami, o'zbek milliy qadriyatlari bilan uyg'unlashgani, maxsus fotosuratlar, video mahsulotlar bilan to'ldirilgani uni yanada samarador va ommabop bo'lishiga xizmat qiladi. Ushbu ajoyib darslik barchaga muborak bo'lsin.