Xitoy Xalq Respublikasida oʻzbek tilining oʻqitilishi
2022-yil 11-noyabr kuni Alisher Navoiy nomidagi Toshkent davlat oʻzbek tili va adabiyoti universitetida “Xitoy Xalq Respublikasida oʻzbek tilining oʻqitilishi” mavzusida Xalqaro ilmiy vebrnar boʻlib oʻtdi. Unda xorijlik va respublikamizda faoliyat koʻrsatayotgan oʻzbek tili oʻqituvchilari, oʻzbek tili va adabiyoti boʻyicha malaka oshirayotgan professor-oʻqituvchilar, magistr -talabalar, ilmiy tadqiqotchilar qatnashdi.
Vebinarni Oʻzbek tili taʼlimi fakulteti dekani prof.S.Muhamedova boshqarib bordi. U oʻz kirish nutqida bugungi vebinarning ahamiyati, mazkur vebinar oʻzbek tilini xorijiy til sifatida oʻqitishga bagʻishlangan 3-vebinar boʻlib, oldin oʻtkazilgan vebinarlar Turkiya Respublikasida va AQSHda oʻzbek tilining oʻqitilishi yuzasidan boʻlganligini eslatib o‘tdi.
Dastlabki soʻz Oliy va oʻrta maxsus taʼlim vazirining maʼnaviy-maʼrifiy ishlar samaradorligini oshirish, davlat tili toʻgʻrisidagi qonun hujjatlariga rioya etilishini taʼminlash masalalari boʻyicha maslahatchisi professor Odinaxon Jamoldinovaga berildi. O. Jamoldinova oʻzbek tilining nufuzini oshirish, jahon miqyosida oʻzbek tilini oʻrgatish va oʻrganish ishlarini yangi sifat bosqichiga koʻtarishda universitet jamoasi tomonidan olib borilayotgan ishlar, xususan, bugungi vebinarning ahamiyati haqida gapirdi.
Maʼruzachilar – Xitoy Xalq Respublikasi Pekin shahrida joylashgan Markaziy Millatlar universiteti Chet tillari fakulteti “Rus va Markaziy Osiyo davlatlari tillari” kafedrasi dotsenti, filologiya fanlari boʻyicha falsafa doktori (PhD) Mirzaahmedova Dilsora, Toshkent davlat oʻzbek tili va adabiyoti universiteti “Folklorshunoslik va dialektologiya” kafedrasi dotsenti, filologiya fanlari nomzodi, dotsent Rahmatov Mardonlarning chiqishi vebinar ishtirokchilarida katta qiziqish uygʻotdi. Vebinar norasmiy, oʻzaro fikr almashishlarga boy tarzda oʻtkazildi. Savol-javoblar, muzokaralar, munozaralar natijasida vebinar ishtirokchilarida xitoyliklarga oʻzbek tilini oʻqitish borasida muayyan yangi gʻoyalar paydo boʻldi va ular bu sohada yangi loyihalarni amalga oshirishga kelishib olishdi.
