Turkiyaning universitetlari bilan hamkorlik oʻrnatilmoqda
“Bugun Nozliya Normurodova boshchiligidagi ishchi guruh a'zolari Turkiyaning bir qator nufuzli universitetlari bilan turli jabhalarda hamkorlikni yo‘lga qo‘yish borasida taklif bildirdi.”
Alisher Navoiy nomidagi Toshkent davlat o‘zbek tili va adabiyoti universiteti xalqaro hamkorlik bo‘yicha prorektori Nozliya Normurodova boshchiligidagi ishchi guruh Turkiyaga xizmat safarida bo‘lib turibdi. Bugun ishchi guruh a'zolari Turkiyaning bir qator nufuzli universitetlari bilan turli jabhalarda hamkorlikni yo‘lga qo‘yish borasida taklif bildirdi. Jumladan, Anqara universiteti, G‘ozi universiteti, Kocatepa universiteti va Boyazid Yildirim universitetlariga tashrif mobaynida hamkorlik bitimlari imzolandi. ToshDO‘TAU jamoasining ilgari surgan takliflari turkiyalik ziyolilarni ham befarq qoldirmadi. Mezbonlar bilan suhbatda har ikki davlat OTMlari o‘rtasidagi hamkorlik butun turkiy xalqlarning mushtarak qadriyatlari rivojida muhim omil ekani qayd etildi. Mazkur uchrashuvda yuqorida nomlari qayd etilgan universitetlar bilan hamkorlikda qo‘shma magistratura mutaxassisliklari ochish, akademik mobillikni yo'lga qo‘yish, pedagog kadrlar malakasini oshirish, ilmiy, o‘quv-uslubiy sohalarda o'zaro amaliy faoliyat olib borish borasida muzokaralar bo‘lib o‘tdi. Turkiy xalqlarning tarixi, madaniyati va tilini tadqiq etish ham chinakam millatsevar kadrlarni tayyorlashning birlamchi omilidir.
