Turkiy xalqlarning ma’naviy integratsiyasi: tili, adabiyoti, madaniyati
2025-yil 30-may kuni Alisher Navoiy nomidagi Toshkent davlat o‘zbek tili va adabiyoti universitetida O‘zbek tili va adabiyoti ta’limi kafedrasi tashabbusi bilan “Turkiy xalqlarning ma’naviy integratsiyasi: tili, adabiyoti, madaniyati” mavzusiga bag‘ishlangan II xalqaro ilmiy-amaliy konferensiya tashkil etildi. Mazkur anjuman 2024-yil 30-may kuni O‘sh davlat universitetida o‘tkazilgan birinchi konferensiyaning mantiqiy davomidir. Anjuman har yili turkiy tilli davlatlardan birida o‘tkazilishi rejalashtirilgan.
Konferensiya Alisher Navoiy nomidagi Toshkent davlat o‘zbek tili va adabiyoti universiteti, Ozarbayjon davlat pedagogika universiteti, O‘sh davlat universiteti, Hoja Ahmad Yassaviy nomidagi Xalqaro Turk-Qozoq universiteti, Abay nomidagi Qozog‘iston milliy pedagogika universiteti, Rossiyaning Bashkortiston Fanlar akademiyasi huzuridagi Strategik tadqiqotlar instituti hamda boshqa nufuzli oliy ta’lim va ilmiy tadqiqot muassasalari hamkorligida tashkil etildi.
Anjumanda O‘zbekiston, Turkiya, Rossiya, Qozog‘iston, Ozarbayjon, Qirg‘iziston kabi mamlakatlardan taniqli olimlar, professorlar va ilmiy tadqiqotchilar ishtirok etdi. Tadbirning ochilish marosimida O‘zbekiston Respublikasi Vazirlar Mahkamasi huzuridagi Davlat tilini rivojlantirish departamenti bosh mutaxassisi, filologiya fanlari bo‘yicha falsafa doktori (PhD) Nodirjon Jo‘raqo‘ziyev, universitet prorektori, filologiya fanlari doktori, professor Normurodova Nozliya Zarilovna va boshqa nufuzli mehmonlar tabrik nutqlari bilan chiqish qildilar.
Yalpi majlis va sho‘ba yig‘ilishlarida turkiy xalqlar adabiyoti va og‘zaki ijodi, zamonaviy turkiy tilshunoslikning dolzarb muammolari, umumiy madaniy meros, ta’lim tizimidagi madaniy hamkorlik, turkiy tillarning rivoji va lingvodidaktik yondashuvlar, shuningdek, adabiyot o‘qitish metodikasi kabi muhim masalalar muhokama etildi.
Konferensiyada turkiy xalqlarning ma’naviy integratsiyasiga oid dolzarb masalalar yuzasidan fikr almashildi, yangi ilmiy-madaniy aloqalar o‘rnatildi va kelgusidagi hamkorlik yo‘nalishlari belgilab olindi. Anjuman Zoom platformasi orqali onlayn tarzda ham tashkil etildi. Ushbu onlayn translyatsiya tufayli 100 nafardan ortiq virtual ishtirokchilar konferensiya ma’ruzalarini tinglash va muhokamalarda faol qatnashish imkoniyatiga ega bo‘ldilar.
Konferensiya natijalari soha mutaxassislari uchun yangi ilmiy g‘oyalar va izlanishlarga turtki berishi, xalqaro hamkorlik aloqalarini mustahkamlashi kutilmoqda. Mazkur anjuman turkiy xalqlarning tili, adabiyoti va madaniyatiga doir dolzarb masalalarning chuqur ilmiy tahliliga imkon yaratgani bilan muhim ahamiyat kasb etadi. Shuningdek, konferensiya natijalari xalqaro ilmiy integratsiyani rivojlantirish, o‘zaro tajriba almashish, metodologik yangiliklarni joriy qilish va kelajak avlodlar uchun mustahkam ilmiy asos yaratishda navbatdagi muhim bosqich sifatida e’tirof etilmoqda.
Konferensiya doirasida, shuningdek, O‘sh davlat universitetida bir yil davomida tashkil etilgan “O‘zbek tili onlayn kurslari”ni muvaffaqiyatli yakunlagan qirg‘izistonlik talabalarni tantanali taqdirlash marosimi ham o‘tkazildi.