ToshDO‘TAUda “Rektor va yoshlar” uchrashuvi bo‘lib o‘tdi
Alisher Navoiy nomidagi Toshkent davlat o‘zbek tili va adabiyoti universitetida talabalarni yangiliklardan xabardor qilish va ular bilan muloqotni mustahkamlash maqsadida “Rektor va yoshlar” uchrashuvi tashkil etildi. Tadbir 2025-yil 21-sentyabr kuni universitetning talabalar turar joyida bo‘lib o‘tdi.
Uchrashuvda universitet rektori, filologiya fanlari doktori, akademik Shuhrat Sirojiddinov talabalar bilan ochiq suhbat qildi. Rektor ta’lim sohasidagi yangiliklar, universitetdagi ilmiy va madaniy faoliyat hamda yoshlarga yaratilayotgan imkoniyatlar haqida so‘zlab berdi. “Sizlar o‘zbek tili va adabiyotining kelajagisiz. O‘z bilimingizni rivojlantirib, milliy madaniyatimizni dunyoga yoyishda faol bo‘ling”, – deb talabalarni ruhlantirdi.
Talabalar o‘quv jarayoni, ilmiy-tadqiqot ishlari va turar joy sharoitlari bo‘yicha savollar berib, takliflar kiritdilar. Xususan, filologiya yo‘nalishidagi talabalar xalqaro ilmiy loyihalarda ishtirok etish va raqamli texnologiyalarni o‘quvda kengroq qo‘llash bo‘yicha fikr bildirdilar. Shuhrat Sirojiddinov har bir taklifni e’tiborga olib, mas’ul xodimlarga aniqlangan masalalarni hal qilish bo‘yicha ko‘rsatmalar berdi.
Tadbir universitetning Yoshlar ishlari bo‘limi tomonidan uyushtirildi. Uchrashuv talabalar va rahbariyat o‘rtasidagi muloqotni yanada mustahkamladi, yoshlarni yangiliklardan xabardor qilish va ularning faolligini oshirishga xizmat qildi. “Rektor va yoshlar” uchrashuvlari muntazam ravishda davom ettiriladi.
