Tojikistonlik talabalar universitetimizda mehmon boʻlishdi
2023 -yilning 11-16- dekabr kunlari Akademik Bobojon G‘ofurov nomidagi Xo‘jand davlat universitetining O‘zbek filologiyasi fakultetining dotsenti f.f.n., dostsent A.U.Rahmonqulov va 6 nafar talabasi akademik mobillik doirasida ToshDO‘TAUga kelishdi. Safarning dastlabki kuniyoq mehmonlarni universitet rektori, professor Sh.S.Sirojiddinov va xalqaro aloqalar bo‘yicha prorektor, professor N.Z.Normurodovalar qabul qildilar. Do‘stona va samimiy vaziyatda o‘tgan uchrashuvda har ikki universitet o‘rtasidagi xalqaro munosabatlarni har tomonlama rivojlantirish, ya’ni ilmiy-nazariy, amaliy, metodik, madaniy – ma’rifiy sohalarda hamkorlik qilish, professor - o‘qituvchilar va talabalarning akademik mobilligi kabi masalalar yuzasidan fikr almashildi. Eng muhimi - talabalarimiz o‘zlariga yangi do‘stlar orttirib, o‘zbeksitonlik tengdoshlari bilan doimiy aloqada bo‘lishga, fikr, tajriba almashib turishga kelishib olishdi.
Shu kuniyoq tojikistonlik mehmonlar uchun ToshDO‘TAU bo‘ylab ekskursiya uyushtirildi. Universitet o‘quv xonalari, talabalar uchun yaratilgan sharoitlar, Mustaqil ta’lim zali, Besh tashabbus bo‘yicha faoliyat ko‘rsatayotgan to‘garaklar, Noshirlik laboratoriyasi mehmonlarda juda katta qiziqish uyg‘otdi. Tashrifning birinchi kuni mehmonlarning O‘zga tilli guruhlarda o‘zbek tili mutaxassisligi magistrantlari uchrashuvi bilan yakunlandi.
2023- yilning 12- dekabr kunida ustoz va talabalar professor N.Jabborovning “O‘zbek adabiyoti tarixi” fanidan, dotsent M.Shodmonovaning “Ona tilini o‘qitish metodikasi” fanidan ma’ruzalarini kuzatib, ularni tahlil qilishdi. Kunning ikkinchi yarmida mehmonlar Toshkent shahridagi muzeylarni ziyorat qilib, so‘ngra O‘zbek Milliy akademik drama teatriga tashrif buyurishdi.
2023- yilning 13-dekabr kunidagi tadbirlar ham juda qiziqarli o‘tdi. Mehmonlar professor B.Karimovning “Adabiyotshunoslikda ilmiy tadqiqot metodologiyasi” fanidan ma’ruzasida qatnashib, yangi bilim va malakalarga ega bo‘lishdi. So‘ngra mehmonlar uchun O‘zbek tili ta’limi fakulteti “Kompyuter lingvistikasi va raqamli texnologiyalari” kafedrasida o‘zbek tilini raqamlashtirish bilan bog‘liq bajarilgan elektron mahsulotlarining taqdimoti o‘tkazildi. Ular universitetda o‘zbek tilini raqamlashtirish bilan bog‘liq qilingan ishlardan katta taassurot olishdi, kelgusida shu kabi ishlarni tojik tili materiallarida hamkorlikda amalga oshirishga kelishib olindi. Kunning ikkinchi yarmida tojikistonliklar Alisher Navoiy nomidagi Milliy kutubxona bilan yaqindan tanishib, uning fondidagi zaruriy kitoblardan foydalanish imkoniyatiga ega bo‘lishdi.
2023 - yilning 14- dekabrida mehmonlar professor Uzoq Jo‘raqulovning “Jahon adabiyotining umuminsoniy muammolari” fanidan ma’ruza mashg‘ulotida, dotsent X.Qodirovaning “Qiyosiy tipologiya” fanidan amaliy mashg‘ulotida qatnashib, o‘zlari uchun yangi ma’lumotlar olishdi va bilimlarga ega bo‘lishdi, kunning ikkinchi yarmida Abror Hidoyatov nomidagi o‘zbek davlat drama teatriga tashrif buyurib, madaniy hordiq chiqarishdi.
2013 - yilning 15- dekabrida mehmonlar professor Q.Yo‘ldoshevning “O‘zbek adabiyotini o‘qitish metodikasi” fanidan, dotsent K.Mavlonovaning “Ona tilini o‘qitish metodikasi” fanidan ma’ruzalarida qatnashib, o‘zbek tili va adabiyotini o‘qitish metodikasi bo‘yicha yangi bilimlarga va katta taassurotlarga ega bo‘lishdi. Shuningdek, ular shu kuni o‘zbek tili va adabiyoti mutaxassiligi bo‘yicha magistrantlar va doktorantlar bilan uchrashuvda qatnashishdi.
Hafta davomida Xo‘jand davlat universiteti dotsenti, filolgiya fanlari nomzodi, dotsent A.U.Rahmonqulov tomonidan Ona tili va adabiyoti ta’limi fakulteti 3-kurs talabalari uchun “O‘zbek tilini o‘qitish metodikasi” fanidan oflayn ma’ruza va amaliy mashg‘ulotlar olib borildi.
Xullas, Xo‘jand davlat universiteti delegatsiyasining universitetitmizga tashrifi davomida samarali uchrashuv va muzokaralar, qo‘shma ma’ruzalar, madaniy tadbirlar o‘tkazildi.
Erishilgan kelishuvlar, albatta, universitetlarimiz o‘rtasidagi kelgusi hamkorlikka katta ta’sir ko‘rsatadi, yangi-yangi loyihalarga yo‘l ochadi, deb umid qilamiz.