Til o'rgatish barobarida madaniy bilimlar ham berilmoqda
Koreys tili fanidan Psixologiya yo‘nalishi 102-guruh talabalari ishtirokida “Koreys milliy taomlari va madaniyati” mavzusida ochiq dars o‘tkazildi. Mashg‘ulotni tajribali fan o‘qituvchisi, PhD Kamola Abdullayeva olib bordi. Darsning asosiy maqsadi talabalarga Koreya xalqiga xos milliy taomlar, ularning kelib chiqishi, tarkibiy xususiyatlari, tayyorlanish jarayoni va madaniy ahamiyati haqida batafsil tushuncha berish, shuningdek, koreys tilidagi so‘z va iboralardan foydalangan holda nutq ko‘nikmalarini rivojlantirishdan iborat edi.
Dars avvalida koreys oshxonasining mashhur taomlaridan biri bo‘lgan 김밥 (kimpap) tayyorlash jarayoni bosqichma-bosqich namoyish etildi. Talabalar jarayonni kuzatish bilan cheklanmay, kichik guruhlarga bo‘linib o‘zlari ham kimpap tayyorlash imkoniga ega bo‘ldilar. Bu amaliy mashg‘ulot ularga nafaqat bilimlarni mustahkamlash, balki tilni amalda qo‘llash va hamkorlik ko‘nikmalarini rivojlantirishga yordam berdi.
Dars davomida talabalar koreys tilidagi kundalik iboralar, taom nomlari va madaniyatga oid atamalarni faol qo‘llashga harakat qildilar. Shuningdek, tayyorlangan taomlarni koreys tilida taqdim etish orqali til bo‘yicha amaliy tajriba orttirdilar.
Ochiq dars samimiy va interfaol ruhda o‘tdi. Talabalar Koreya madaniyati va oshxonasiga bo‘lgan qiziqishini yanada oshirib, til o‘rganish jarayonini qiziqarli va samarali tarzda davom ettirdilar. Mashg‘ulot Psixologiya yo‘nalishi 102-guruh talabalari uchun nafaqat yangi bilim, balki esda qolarli madaniy tajriba bo‘ldi.
