“Ochiq eshiklar kuni” tadbiri o‘tkazildi
Alisher Navoiy nomidagi Toshkent davlat o‘zbek tili va adabiyoti universitetida mahalla yoshlari uchun “Ochiq eshiklar kuni” tadbiri tashkil etildi. Ushbu tashabbus yoshlarning oliy ta’lim muhitini yaqindan ko‘rishi, o‘z qiziqishlari bo‘yicha to‘g‘ri yo‘nalishni tanlashiga ko‘maklashishni maqsad qildi.
Tadbir davomida ishtirokchilar universitetda mavjud ta’lim yo‘nalishlari, o‘quv jarayonida qo‘llanilayotgan zamonaviy metodlar, kutubxona va laboratoriyalar faoliyati, shuningdek, talabalarga yaratilgan qulay sharoitlar bilan tanishdilar. Universitetning turli to‘garak va klub faoliyatlari haqida batafsil ma’lumot berilib, yoshlarda amaliy qiziqish uyg‘otildi.
Uchrashuv ochiq muloqot shaklida o‘tdi. Yoshlar o‘zlarini qiziqtirgan savollarni bemalol berishdi, mutaxassislar esa ularga kasb tanlash, kelajak rejalarini belgilash hamda o‘qishga tayyorgarlik borasida foydali tavsiyalar berdilar. Tadbir doirasida yoshlar uchun motivatsion suhbat ham tashkil etilib, ularni ilm olishga, o‘z ustida ishlashga undaydigan fikrlar bildirildi.
Tadbir yakunida ishtirokchilar universitet hayoti bilan to‘liqroq tanishish imkoniyatiga ega bo‘lib, kelajakdagi o‘qish va kasb tanlovi borasida aniqroq tasavvur hosil qildilar.