Janubiy Koreya universitetlarida o‘zbek tilini o‘qitish tajribasidan
Toshkent davlat o‘zbek tili va adabiyoti universitetida 2020- yildan beri xorijda o‘zbek tilini o'qitish masalalariga bag‘ishlab doimiy xalqaro vebinarlar tashkil qilinib kelinmoqda. Xususan, 2023 - yil 5-may kuni Toshkent davlat o‘zbek tili va adabiyoti universitetida Janubiy Koreyaning Xankuk chet tillari universiteti professori, PhD Aziza Mashrabbekova ishtirokida “Janubiy Koreya universitetlarida o‘zbek tilini o‘qitish tajribasidan” mavzusida xalqaro vebinar tashkil qilindi. Vebinarda ToshDO‘TAU prorektori O.Jamoliddinova, O‘zbek tili ta’limi fakulteti professor-o‘qituvchilari, talabalari va ZOOM orqali boshqa qiziquvchilari ham qatnashdilar. Aziza Mashrabbekova Vebinarda, avvalo, Janubiy Koreyadagi OTM, xususan, Xankuk chet tillari universiteti (xususiy universitet, Koreya reytingida 8-o‘rin, dunyo reytingida 45-o‘rin, 45 ta til o‘qitiladi) haqida ma’lumotlarni taqdim qildi. Mazkur universitetda “Markaziy Osiyoni o‘rganish” kafedrasi mavjud bo‘lib, unda o‘zbek va qozoq tillari o‘qitiladi (8 semestr davomida). Bugungi kunda kafedrada 70dan oshiq talaba o‘zbek tilini o‘rganmoqda.
Ma’ruzachi o‘z taqdimotida Janubiy Koreyada o‘zbek tilini o‘qitish masalasini o‘z tajribasidan kelib chiqqan holda namoyish etib berdi. U faoliyat turlarini 6 ga bo‘lgan holda har bir faoliyat uchun talabalarga foydali va qiziqarli bo‘lgan blits- savollar, topshiriqlar, matnlar, rasmlarni qay yo‘sinda qo‘llash mumkinligini tushuntirdi. O‘zbekistonlik hamkorlar bilan nashr qilingan darsliklar, o‘quv qo‘llanmalari haqida ma’lumotlar berildi. Norasmiy va do‘stona ruhda o‘tgan vebinarda har ikki tomon uchun foydali bo‘lgan hamkorliklar bo‘yicha kelishib olindi, yangi g‘oyalar muhokama qilindi.
Vebinarda ishtirokchilar ma’ruzachiga ko‘plab savollar bilan murojaat qilib, ma’ruza-tadqimotning qizg‘in muhokamasida qatnashishdi. Ishtirokchilar ma’ruzachiga taqdimot va yangi ma’lumotlar uchun minnatdorlik bildirib, keyingi hamkorlik rejalariga umid bildirishdi.