Ishonchni oqlaymiz!
Prezidentimiz Shavkat Mirziyoyevning yoshlarga qaratgan e’tibori bugungi kunda yurtimizda muhim o‘zgarishlarga sabab bo‘lmoqda. Uchrashuvda ta’kidlangan asosiy yo‘nalishlar yoshlarning har tomonlama rivojlanishi uchun keng imkoniyatlar yaratmoqda.
Ta’lim sohasida – "6+2" tizimi joriy etilishi natijasida xorijiy tillarni o‘rganish imkoniyati oshdi. Bu dasturga ko‘ra, dastlabki 2 oy o‘quvchi hisobidan, keyingi 6 oy esa davlat tomonidan qoplanadi. Bundan tashqari, kam ta’minlangan oilalar farzandlarining oliy ta’lim olishlari uchun qo‘shimcha shart-sharoitlar yaratilmoqda. Bu esa yoshlarning bilim olish imkoniyatlarini kengaytirib, kelajakda yetuk mutaxassislar yetishib chiqishiga xizmat qiladi.
Ma’naviyat va huquqiy savodxonlik – Davlatimiz rahbari yoshlarning huquqiy ongi va ma’naviyatini yuksaltirish masalasiga ham alohida e’tibor qaratdi. Huquqiy bilimlarni oshirish yoshlarning jamiyatdagi o‘rnini mustahkamlashga yordam beradi.
Tadbirkorlik bo‘yicha – Yoshlarning biznes bilan shug‘ullanishi uchun 400 million AQSh dollari ajratildi. Ushbu mablag‘lar yoshlar uchun yangi ish o‘rinlari yaratish, innovatsion loyihalarni moliyalashtirish va iqtisodiy mustaqillikka erishish imkonini beradi. Shuningdek, yosh tadbirkorlarni qo‘llab-quvvatlash maqsadida maxsus grantlar, imtiyozli kreditlar va startap dasturlari ham joriy etiladi.
Sport sohasida – Yoshlarni jismoniy tarbiya va sport bilan muntazam shug‘ullanishga jalb qilish bo‘yicha keng ko‘lamli chora-tadbirlar rejalashtirilgan. Sport – nafaqat sog‘lom turmush tarzi, balki xalqaro maydonda yurtimiz sharafini himoya qilish uchun ham muhim omildir. Sport inshootlarini yangilash va yangi sport majmualarini qurish bo‘yicha dasturlar ishlab chiqilgan.
Kelajak istiqbollari – Yoshlar uchun yaratilayotgan sharoitlar ularning kelajakda yurt ravnaqiga o‘z hissasini qo‘shishiga xizmat qiladi. Ushbu islohotlar natijasida bilimli, huquqiy ongli, tadbirkor va jismonan baquvvat yosh avlod shakllanadi.
Berilayotgan imkoniyatlardan samarali foydalanish har bir yoshning burchi. O‘zbekiston kelajagi – yoshlar qo‘lida!
Alisher Navoiy nomidagi Toshkent davlat o‘zbek tili va adabiyoti universitetining Yoshlar ittifoqi boshlang‘ich tashkilot yetakchisi Sodiqov Mirjalol Asomiddin o‘g‘li