“Dolzarb 90 kun” loyihasi doirasida ko‘ngilochar tadbir tashkil etildi
O‘zbekiston Respublikasi Prezidenti tomonidan 2025-yil 15-may kuni ta’lim tizimidagi islohotlar samaradorligini oshirishga bag‘ishlab o‘tkazilgan videoselektor yig‘ilishida yoshlarning bo‘sh vaqtini mazmunli tashkil etish masalasiga alohida urg‘u berildi. Ushbu vazifalar ijrosi doirasida “Dolzarb 90 kun” loyihasi boshlab berildi.
Loyiha doirasida talaba-yoshlarning yozgi ta’til davridagi bo‘sh vaqtlarini samarali o‘tkazish maqsadida mamlakatimiz bo‘ylab turli madaniy-ma’rifiy va ko‘ngilochar tadbirlar tashkil etilmoqda.
Shu jumladan, Toshkent shahri Yakkasaroy tumanidagi “Moviy gumbaz” xiyobonida bo‘lib o‘tgan tantanali ochilish marosimida turli musiqiy chiqishlar, interaktiv o‘yinlar va madaniy ko‘rgazmalar namoyish etildi.
Mazkur tadbirda Alisher Navoiy nomidagi Toshkent davlat oʻzbek tili va adabiyoti universiteti talabalari ham faol ishtirok etib, yoshlar orasida ijtimoiy faollik va sog‘lom turmush tarzini targ‘ib etishga munosib hissa qo‘shdilar.
“Dolzarb 90 kun” loyihasi yoshlarning iste’dodini ro‘yobga chiqarish, ularni madaniy hayotga keng jalb etish hamda bo‘sh vaqtlarini mazmunli o‘tkazish yo‘lida muhim platforma bo‘lmoqda.