Boʻlajak sotsiologlar uchun maxsus uchrashuv
Universitetimizda 2023- yilning 15- noyabrida Sotsiologlar kuni munosabati bilan “Nazar Business and Technology”, LLC - NBT tadqiqot agentligi hamda “M-Vektor”xalqaro tadqiqotlar va konsalting kompaniyalari vakillari bilan uchrashuv bo‘lib o‘tdi. Unda “Nazar Business and Technology, LLC - NBT” tadqiqot agentligining direktori, kimyo fanlari nomzodi, dotsent Madina Xolmirzayeva, mazkur kompaniya Biznesni rivojlantirish bo‘limi boshlig‘i Xolida Tabibullayeva, “M-Vektor” xalqaro tadqiqotlar va konsalting kompaniyasi direktori Aziz Hasanov, kompaniya bo‘lim boshlig‘i Gulzoda Teshaboyeva, kompaniya bosh mutaxassisi Hasan Qurbonov, O‘zbek tili ta’limi fakulteti professor-o‘qituvchilari va sotsiologiya ta’lim yo‘nalishi 1-2-kurs talabalari qatnashishdi.
Dastlabki so‘z “Nazar Business and Technology, LLC - NBT” tadqiqot agentligining direktori Madina Xolmirzayevaga berildi. U o‘z taqdimotida kompaniya haqida batafsil ma’lumot berish barobarida qaysi yo‘nalishlarda bo‘lajak sotsiolog – talabalar bilan hamkorlik qilish, ya’ni kompaniyadagi aynan qaysi vazifalarni talabalar bajara olishlari mumkinligi, ularning mehnatiga qancha haq to‘lanishi mumkinligi haqida to‘liq axborot berdi. Ayniqsa, hozirgi kunda o‘zbek tilini yaxshi biladigan, unga turli tillardan tarjimalarni amalga oshira oladigan tarjimon - sotsiologlarga ehtiyoj juda katta ekanligini ta’kidladi. Va talabalarni o‘z sohasining yetuk mutaxssisi bo‘lish bilan birga bir nechta tilni yaxshi o‘rganish zarurligini ta’kidlab, ularni kompaniyaga ishga (tanlov asosida) taklif qildi.
Soʻngra “M-Vektor” xalqaro tadqiqotlar va konsalting kompaniyasi bosh mutaxassisi Hasan Qurbonov kompaniya haqida to‘liq ma’lumotlarni berdi va shu kungacha u tomonidan o‘tkazilgan yirik loyihalar bilan yig‘ilganlarni tanishtirdi. Hasan Qurbonov ham o‘z nutqida bo‘lajak sotsiologlar qanday sifatlarga ega bo‘lishi, nimalarga alohida e’tibor qaratishi zarurligini ochib berdi.
Mehmonlar har ikki kompaniyada ham amaliyot o‘tashi mumkinligi haqida gapirib, buning uchun har qanday yordam va maslahatlarga tayyor ekanliklarini bildirishdi.
Kompaniya direktorlari professor-o‘qituvchilar va talabalarni qiziqtirgan barcha savollarga to‘liq javob berishdi.
Uchrashuv yakunida fakultet dekani prof. S.Muhamedova mehmonlarga bugungi qiziqarli va foydali uchrashuv minnatdorchilik bildirdi hamda ularga universitet rahbariyati tomonidan taqdim qilingan sovg‘alarni topshirdi.
Universitet va kompaniyalar o‘rtasida o‘zaro hamkorlik shartnomalarini tuzishga va bu boradagi ishlarni yanada rivojlantirishga kelishib olindi.