Barqaror rivojlanish asoslari
ToshDO‘TAU xalqaro offisi tomonidan an'anaviy Ochiq muloqotining navbatdagisi yirik global muammo va uning yechimlariga bag‘ishlandi. Bu galgi ma'ruzachilar italiyalik Daniela Biokka va Stefano Battain “Barqaror qishloq xo‘jaligi va atrof-muhit obodligini targ'ib qilish” mavzusida qiziqarli ma'lumotlar va tajribalarni o‘rtoqlashdilar.
ToshDO‘TAU tomonidan tashkil etilgan va barcha uchun ochiq bo'lgan shu singari ommaviy suhbatlar 2030-yilgacha Barqaror rivojlanish bilan bog'liq ko'nikmalarni oshiradi, shu bilan birga oliy ta'lim muassasalarini global maqsadlarga erishish uchun manfaatdor tomonlar sifatida jalb qilishga yordam beradi. Barqaror rivojlanish maqsadi 12 (SDG 12 yoki Global Goal 12), "mas'uliyatli iste'mol va ishlab chiqarish" deb nomlangan, Birlashgan Millatlar Tashkiloti tomonidan 2015-yilda taklif etilgan 17 Barqaror Rivojlanish Maqsadlaridan biri.
Daniela va Stefano 2015-yilda dunyo bo‘ylab ijtimoiy-ekologik sayohatlari va professional tajribalari asosida barqarorlik boʻyicha birinchi tajribalari haqida gapirib berishdi. Ular 20 mamlakat bo'ylab sayohatlari davomida barqaror qishloq xo'jaligi va umuman ekologik barqarorlikni targ'ib qiluvchi turli mahalliy hamjamiyat va fuqarolik jamiyati tashkilotlari bilan uchrashdilar.
Ma'ruza davomida talabalarimiz agroekologiya, permakultura, akvaponika va organik texnikalar orqali yanada barqaror qishloq-oziq-ovqat tizimini taklif qiluvchi tajriba va loyihalar haqida ma'lumotlarga ega bo‘ldilar. Ishtirokchilar turli mamlakatlarda shaxslar, jamoalar va uyushmalar yer, suv, mahalliy madaniyat va biologik xilma-xillikni yaratuvchi modellarni qanday himoya qilayotganini, ijtimoiy-ekologik adolatni, ekologik barqarorlikni va iqlim muvozanatini targ'ib qilishini ko'rib chiqdilar.
Bizni yashaydigan jonajon Yer sayyorasiga zarar yetkazmasdan odamlar qanday usulda oziq-ovqat yetishtirishlari va ular nima yeyayotgani ustidan nazoratni kuchaytirish, uni ekologik, ijtimoiy natijalar bilan muvozanatlash uchun mumkin bo'lgan yechimlar muhokama qilindi.
