“Zukko kitobxon” tanlovi — bilim va mutolaa targ‘iboti
Alisher Navoiy nomidagi Toshkent davlat o‘zbek tili va adabiyoti universiteti Axborot-resurs markazi tomonidan talaba-yoshlar o‘rtasida kitobxonlik madaniyatini yuksaltirish, badiiy adabiyotga bo‘lgan qiziqishni oshirish hamda mutolaa orqali mustaqil fikrlash ko‘nikmalarini rivojlantirish maqsadida “Zukko kitobxon” ma’naviy-ma’rifiy va intellektual tadbiri tashkil etildi.
Tadbirda Axborot-resurs markazi jamoasi, professor-o‘qituvchilar hamda talaba-yoshlar faol ishtirok etdi. Unda kitobning inson ma’naviy olamini boyitish, tafakkurini rivojlantirish, dunyoqarashini kengaytirish va intellektual salohiyatini oshirishdagi o‘rni alohida ta’kidlandi. Shuningdek, yoshlar o‘rtasida mutolaa madaniyatini keng targ‘ib etish, ularning badiiy asarlarga bo‘lgan qiziqishini qo‘llab-quvvatlash va kitobxonlikni kundalik hayotning ajralmas qismiga aylantirish masalalariga e’tibor qaratildi.
Tanlov davomida ishtirokchilar o‘z bilimlari, kitobxonlik darajasi va fikrlash salohiyatini namoyon etish imkoniga ega bo‘ldilar. O‘qilgan asarlar mazmuni yuzasidan fikr almashish, adabiy bilimlarni sinovdan o‘tkazish hamda mutolaa jarayonida egallangan bilimlarni mustahkamlash tadbirning muhim jihatlaridan biri bo‘ldi.
Bunday ma’naviy-ma’rifiy tadbirlar yoshlarning kitobga bo‘lgan mehrini oshirish, ularni muntazam mutolaaga jalb etish, adabiy tafakkurini rivojlantirish hamda bilimli va keng dunyoqarashga ega avlodni tarbiyalashga xizmat qiladi. “Zukko kitobxon” tanlovi ham kitobxonlikni targ‘ib etish va yoshlarning intellektual salohiyatini ro‘yobga chiqarishga qaratilgan muhim tashabbuslardan biridir.
